ગ્રે કાપડનું ક્વોલિટી સ્પેક કેવી રીતે વાંચવું

સુરતમાં ગ્રે કાપડનું સ્પેક સામાન્ય રીતે આંકડાની એક નાની લાઇનમાં લખાય છે. દરેક આંકડાનો અર્થ સમજાય, પછી અલગ-અલગ વીવરની ક્વોલિટી સરખાવી શકાય અને એ જ કાપડ ફરી મંગાવી શકાય.

સ્પેકના ભાગ

ડેનિયર – યાર્ન કેટલું જાડું છે

ડેનિયર એટલે 9,000 મીટર યાર્નનું ગ્રામમાં વજન. 60 ડેનિયર યાર્નના 9,000 મીટરનું વજન 60 ગ્રામ. ડેનિયર વધારે = યાર્ન જાડું. પોલિએસ્ટર ફિલામેન્ટ યાર્નમાં ફિલામેન્ટની સંખ્યા પણ લખાય છે, સ્લેશ પછી: 75/36 એટલે 36 ફિલામેન્ટનું 75 ડેનિયર.

કાઉન્ટ – કોટનમાં એ જ વાત બીજી રીતે

કોટન અને સ્પન યાર્નમાં કાઉન્ટ (Ne) વપરાય છે: એક પાઉન્ડમાં 840 યાર્ડની કેટલી આંટી આવે. કાઉન્ટ વધારે = યાર્ન પાતળું – ડેનિયરથી ઊંધું. અંદાજે ફેરવવા માટે:

કાઉન્ટ (Ne) ≈ 5315 ÷ ડેનિયર

એટલે 75 ડેનિયર ≈ 71s કાઉન્ટ, અને 150 ડેનિયર ≈ 35s કાઉન્ટ.

EPI અને PPI – કાપડ કેટલું ગાઢ વણાયું છે

• EPI (ends per inch): પનામાં એક ઇંચમાં તાણાના કેટલા તાર.
• PPI (picks per inch): લંબાઈમાં એક ઇંચમાં વાણાના કેટલા તાર. સુરતમાં તેને સામાન્ય રીતે પીક જ કહે છે.

રીડ

રીડ એ લૂમ પરનો કાંસકો છે, જેમાંથી તાણાના તાર પસાર થાય છે. રીડ નંબરથી ઇંચ દીઠ કેટલા ખાના (dent) છે તે ખબર પડે, અને ખાના દીઠ તારની સંખ્યા સાથે EPI નક્કી થાય. વીવર ઘણીવાર EPI-PPI ને બદલે રીડ અને પીક બોલે છે. રીડ બધે એક જ રીતે લખાતી નથી, એટલે ક્વોલિટી સરખાવતા હો તો વીવર પાસે EPI પણ માંગો.

TPM – કેટલો ટ્વિસ્ટ

TPM એટલે યાર્નમાં મીટર દીઠ કેટલા વળ. ટ્વિસ્ટ TFO મશીન પર ચડે છે. વધારે ટ્વિસ્ટથી કાપડ કડક, દાણાદાર, ક્રેપ જેવું બને; ટ્વિસ્ટ વગરના ફિલામેન્ટથી સુંવાળું, ચમકવાળું. કેટલાક સ્પેકમાં TPI (ઇંચ દીઠ વળ) લખાય છે: TPI × 39.37 = TPM. જ્યોર્જેટ જેવા કાપડમાં ટ્વિસ્ટની દિશા (S કે Z) પણ મહત્ત્વની છે.

પનો

લૂમ પરથી ઉતરે ત્યારનો ગ્રે પનો, ઇંચમાં. પ્રોસેસ પછીનો ફિનિશ્ડ પનો સામાન્ય રીતે ઓછો હોય છે, કારણ કે કાપડ સંકોચાય છે. કેટલું ઓછું થશે તે પ્રોસેસરને પૂછો.

તાકા દીઠ વજન અને મીટર

ગ્રે કાપડ તાકામાં વાળીને વેચાય છે. સ્પેકમાં સામાન્ય રીતે તાકા દીઠ મીટર અને તાકા દીઠ વજન (કિલો) હોય છે. આખા માર્કેટમાં તાકાની લંબાઈ એકસરખી નથી, એટલે બંને આંકડા હંમેશા ચેક કરો.

GSM

GSM એટલે ચોરસ મીટર દીઠ ગ્રામ. તેનાથી અલગ પનાના કાપડ સરખાવી શકાય. ગ્રે GSM અને ફિનિશ્ડ GSM સામાન્ય રીતે અલગ હોય છે.

દાખલો

આ ફક્ત દાખલો છે, ગણતરી સમજાવવા માટે. આ અમારી કોઈ ક્વોલિટી નથી.

વિગત	માપ
તાણો	50 ડેનિયર પોલિએસ્ટર FDY
વાણો	75 ડેનિયર પોલિએસ્ટર FDY, ટ્વિસ્ટ
EPI × PPI	150 × 90
પનો	44 ઇંચ
તાકા દીઠ મીટર	100 m

1. ચોરસ મીટર દીઠ તાણાનું વજન. એક મીટર પનામાં 150 × 39.37 ≈ 5,906 તાર. દરેક તાર 1 મીટર લાંબો અને તેનું વજન 50 ÷ 9,000 ગ્રામ.

5,906 × 50 ÷ 9,000 ≈ 32.8 g

2. ચોરસ મીટર દીઠ વાણાનું વજન. એક મીટર લંબાઈમાં 90 × 39.37 ≈ 3,543 પીક, દરેક લગભગ 1 મીટર પહોળી.

3,543 × 75 ÷ 9,000 ≈ 29.5 g

3. ગ્રે GSM. 32.8 + 29.5 ≈ 62 GSM, ક્રિમ્પ પહેલા. વણાટમાં યાર્ન ઉપર-નીચે વળે છે (ક્રિમ્પ), એટલે સાચો આંકડો થોડા ટકા વધારે – અહીં અંદાજે 64–66 GSM. તાણા પરની સાઇઝ થોડું વધુ ઉમેરે.

4. તાકા દીઠ વજન. 44 ઇંચ = 1.118 મીટર. એક રનિંગ મીટરનું વજન આશરે 62.3 × 1.118 ≈ 69.6 g, એટલે 100 મીટરનું આશરે 7.0 kg, ક્રિમ્પ વગર.

સપ્લાયરનું તાકા દીઠ વજન સ્પેક પરથી આવતા આંકડાથી બહુ અલગ હોય, તો કારણ પૂછો. ડેનિયર અલગ હોય, પીક વધારે હોય, કે તાકાની લંબાઈ અલગ હોય.

ક્વોલિટી સરખાવવા માટે ચેકલિસ્ટ

1. તાણા અને વાણામાં એ જ યાર્ન અને ડેનિયર?
2. એ જ TPM અને ટ્વિસ્ટની દિશા?
3. એ જ EPI અને PPI (અથવા એ જ રીડ સિસ્ટમ પર રીડ અને પીક)?
4. એ જ ગ્રે પનો?
5. તાકા દીઠ વજન અને મીટર – GSM સરખું આવે છે?

આ પણ જુઓ: ગ્રે કાપડ શબ્દકોશ, અથવા અમારા રેનિયલ ગ્રે કાપડ પેજ પર સાચું સ્પેક.